دليل شامل: أفضل أنماط الشعر النبطي وحكمها في عالم الآداب

الشعر النبطي

كتبت الشعر من قلبي وخطّيته

على صفحات تنزف حبرها الدامي

كتبته والشعر من يوم ناديته

لفاني وحطّ معنى القاف قدّامي

وانا من خيرته طبت وتنقّيته

وميٍّزت الحروف بلحن وأنغامي

وجاذبته وخفّضته وعلّيته

ورتّبته وخطّيته بالاقلامي

ولي ما يستوي بالشعر سوّيته

وفي شعري تحقق كل الأحلامي

عطاني الله زمامه ثم تلّيته

وطاوعني ولا يرفض لي أحكامي

ألا يامن على العربان بدّيته

وعن غيره تميّز ريم الأريام

فلا شفت الذي مثله ولا ريته

كمَل والكامل الله رب الآنامي

ألا يا من فوادي الميّت أحييته

بطيب القلب مع أخلاق الاحشامي

وكل الحسن عن غيرك تولّيته

حرام اترك لهم لا اتصيبك آثامي

كتبت الخط لك صافي وعنّيته

جداكم يا سليل الناس الأكرامي

كتبته ومن دعاني الشوق لبّيته

وانا من لي سواكم يسعف آلآمي

أنا لولاك باب الحب ما جيته

ولا غامرت في بحره الذي طامي

ولا سجلت به نبضي وغنّيته

على ألحان قلبي المولع الظامي

وذا العالم على شانك تحدّيته

ولا همّتني احدوده والأيامي

وهذا الشعر في حرفه وفي بيته

كتبته من معاني شخصك السامي

وكفّ الشعر لك بالحب مدّيته

تفضّل ذوق طعم الحب واهيامي

لأنك صرت له الأسباب ناديته

وهذا ردّ فعل القلب ما إيلامي

اللي يقول الحب ولى زمانه

ما يدري ان الناس ما يستووني

صحيح بعض الناس خان الأمانة

لكن بعظهم ما نوى إنه يخوني

الحب بقلوب البشر له مكانه

البعض صانه والبعض مايصوني

اللي يصونه يهتني في كيانه

يلقى لطعمه ألف شكل ولوني

يعيش فيه ويرتوي من حنانه

ولا يظن بسيئات الظنوني

واللي ماصانه صار محبط وهانه

يقول ولى قبل جيله يجوني

ماغير يسمع فيه ياليل أدانه

يفكره روتين ولا فنوني

ما يدري إن الحب عظيم شانه

ممزوج بأرواح البشر والشجوني

الحب اكبر من مجرد ميانه

ما هو كلام إعجاب شخص يموني

الحب يلوي القلب كالخيزرانه

ويميله يم الحبيب الفتوني

غصبٍ عليك الحب يفلت عنانه

ما ينتظر جوارحك يأذنوني

بس البشر فيهم جحود ولعانه

ون صادفك مكروه جو يشمتوني

والحب ماله ذنب يقتل عشانه

بعض البشر للحب مايرحموني

أما البعض.. فالحب فيهم ديانة

وأحبابهم بقلوبهم يسكنوني

هذا جوابي.. يامدور بيانه

كل البشر للحبمايستووني

شعر نبطي حكم

معوّض خير يا حي تهقوى في الزمان ومال

سنينك لو رقيت بعدلها يطرحك مايلها

تعلّم واعرف إن الدرب قدامك سهل وجبال

جبال تطولها وجبال بعيونك تخايلها

ومعوّض خير يا حيٍ وردت الماء بدون حبال

يطول بك الوقوف وشربة الماء ما تحصّلها

وقوفك عند راس البير مايسقيك لو فنجال

ولا ينفعك شوف الجمه اللي منت طايلها

ومعوّض خير يا حيٍ خدعك من الرجال أشكال

تشوف أشكالها وتحطها أرفع من منازلها

تعلّم من زمانك لا تصير من أجهل الجهال

ترى في كل يوم تجيك عبرة لا تجاهلها

إذا ربي وهب لك عقل تلقى في الرجال رجال

تعرف اللي يطلّع قيمتك واللي ينزلها

ترى من بعض ما يندي الجبين ويحرج الرجال

ليا ساق الميانه في نفوسٍ ما تقبّلها

ومهما شفت في صاحبك من نخوة وطيبة فال

ترى بعض السجايا كثرة الإلحاح يقتلها

معاريف الرجال ديون وديون الرجال ثقال

ليا صرت متعافي ليش تغرق في جمايلها

رصيدك في حياتك سمعتك مع طيبين الفال

رجال الطيب والمعروف بالمعروف عاملها

ولا تبدي بجاهك في مقام ما يسر الحال

ولا تشفع لناسٍ ما تنومسك بفعايلها

ليا جاتك تعذّرها مدام العذر له مدخال

ووقت الجد قول لها الصحيح ولا تجاملها

وخذ مني نصيحة لا تصدق كل ما ينقال

يجرك للنميمة لين يطرحك بحبايلها

يجيلك ناقل النمّات بهروجٍ تغث البال

سوالف في قفاك وحظك أطيب يوم تجهلها

يبرّر بالحمية والصداقة شينة الأفعال

يجمّل صورته بعلومه اللي ما تجمّلها

ولو كانت حميّه فيك رد المخطيه في الحال

ولا كان استمعها في قفاك وجاك شايلها

ترى من جاب لك ودّى وهذي عادة النقال

يحاول يقتنص من فمك كلمة لأجل ينقلها

ومثل ما قال عندك راح عنك وعند غيرك قال

وزوّد عشر فوق الكلمة اللي كنت قايلها

تجنّب مجلسه لا تجلس إلّا مع كريم خصال

تحمّل ميلته وإن ملت ميلتك يتحمّلها

ولا تصبر على الجار الردي لو هي ثلاث ليال

تضرك جيرته لو كان بيبانك تقفلها

وبيع الدار بأول سومةٍ تعرض على الدلال

ورزقك عند ربٍ كاتب اللقمة وكافلها

وبنتك لا تزوجها الردي لو هو كثير المال

تربيها على الطالات وتشوّه سلايلها

وكم من لاش يرمي خيبة ابنه فوق رأس الخال

لو إن الخال من روس الرجال ومن دلايلها

ليا منك عرفت تميّز الطيّب من البطال

وفادتك التجارب في الحياة وفي مسايلها

وكشفت الفرق ما بين الصحيح وحيلة المحتال

وتعلمت الفراسة في الوجيه اللي تقابلها

شعر عبدالله بن صقيه التميمي

ويقول الشاعر عبد الله بن صقيه التميمي:

ساس الردي لابد مبناه ينهال

ولد الردي صاحبي تحطه بطانة

تلقاه وقت الضيق لاصكك الجال

الصفر لا يغريك زين لمعانه

ترى الذهب من صافي جنيه واريال

ما يختلف يا ذيب طيلة زمانه

بستان غيرك لوبه ألوان وأشكال

ما تنتفع من خوخه وبردقانه

ما ينفعك ما فيه لو بالثمر مال

لا صار بالغدراء جداره مخانه

شعر غازي بن دخيل الله بن عون

قال الشاعر غازي بن دخيل الله بن عون:

الرفقة اللي مالها ساس ووصول

اتلى تلياها تروح بسهولة

مثل الذرور اللي على راس غرمول

أول مهب يعترض له يزوله

والفعل ما يطلع على مستوى القول

يقول قول ما يطبق فعوله

والفرق في الأفعال، ماهوب في الزول

وألا ترى أطيب ما من الثور زوله

لو غرّهم زوله، وحطوه مسؤول

صاروا مثل راع الغنم ومخيوله